إنتهينا من تجربة موبايل شاومي الجديد اللي في الفئة الإقتصادية وهو الـRedmi 9 .. الموبايل ده فعلًا ممكن يكون الأمل الأخير لشركة شاومي في فئة سعرية مفيش فيها منافس يقدر يسد قصادها ؟ .. هل فعلًا الموبايل ده هيكون الأقوى في فئته السعرية ؟ في المراجعة النهارده هنعرف كل حاجه عنه.
موبايل Redmi 9 جاي بخامات من البلاستيك بالكامل .. وده طبيعي في الفئة السعرية ديه .. لما تبص على الظهر من بعيد هتحسه Note 8 Pro في نفسه كده .. لانه واخد نفس طابع التصميم الخلفي وشكل رصة الكاميرات الخلفية.
وبالمناسبة الكاميرات الخلفية هنا بروزها صغير اوي .. وكمان الجراب المُرفق في العلبة بيغطي البروز الصغير ده .. فا أعتقد مش هنلاقي مشكلة التراب اللي في الـNote 9S.
تصميم الظهر عليه نقشة خفيفة كده .. لما تمشي صباعك عليه بتسمع صوت كده .. علشان يبقى مقاوم أكتر للخرابيش والكلام ده.
وبالنسبة للوزن والأبعاد فا الموبايل بيجي بوزن 198 جرام وتخانه 9.1 ملم .. مش صغير ومش كبير .. بس اللي لاحظته فيه توزيع الوزن كويس جدًا ومش هيحسسك إنك شايل موبايل تقيل في إيدك.
الشاشة :-
شاشة كبيرة بتيجي بحجم 6.53 بوصة من نوع IPS LCD وبدقة FHD+ .. اخيرًا في الفئة الإقتصادية موبايل بشاشة محترمة في الفئة دي.
الشاشة طبعًا واخدة الشكل القديم النوتش الـWater Drop .. ومفيش مشكلة من الموضوع ده علشان يسيبوا شكل الثقب للموبايل الأغلى منه واللي هو الـRedmi Note 9.
الشاشة للأسف مقدرتش أعرف نوعها .. هي اللي بتطبع مع الإستخدام ولا لأ ! وديه
حاجة في علم الغيب .. هتظهر مع الإستخدام بقى.
ألوان الشاشة كويسة ومعنديش معاها مشاكل .. بس سطوع الشاشة أقل بفرق واضح عن
المنافس المُباشر من ريلمي .. الدقة في Redmi 9 افضل لكن السطوع في الـRealme
C3 أفضل.
تقدر تلغي شكل النوتش من الإعدادات لو حابب .. والشاشة عليها طبقة حماية Corning
Gorilla Glass الجيل
الثالث والموبايل كمان جاي في العلبة متركب عليه سكرينة.
وبصراحة حاجه كويسة جدًا اننا نشوف شاشة بالدقة دي وبالسعر ده .. بس سطوع الشاشة للأسف مش الأفضل .. ونوع الشاشة مش واضح .. هل هتطبع مع الوقت ولا لا.
الأداء :-
بإختصار .. موبايل Redmi 9 فيه أقوى مُعالج في الفئة السعرية اللي تحت 2500 جنية وهو الميدياتيك Helio G80 .. محقق أعلى سكور في Antutu تقريبًا في الفئة ديه.
بصراحه بتدايق لما بشوف موبايل بمعالج ميدياتك Helio P22 في نفس الفئة السعرية .. فرق كبير أوي في الأداء فعلًا .. وكمان متفوق على الـRealme C3 في Antutu.
موبايل Redmi 9 أداءه مُبشر جدًا .. اداء مُستقر جدًا مفيش فيه اي
مشاكل من اللي حصلت في Redmi Note 9 .. شاومي فعلًا مظبطة الموبايل ده قبل ما ينزل.
وبالمناسبة النسخة اللي بنجربها هي الـ4 جيجا رام .. ونوع الذاكرة الداخلية
هنا eMMC 5.1 وده
النوع البطيء شوية وده المُتعارف عليه في الموبايلات الإقتصادية.
بالنسبة للأداء الرسومي لعبة PUBG بتشتغل على اعدادات جرافيك High
HD واللعبة بتشتغل كويس
جدًا .. ولعبة Call Of Duty اشتغل على اعدادات جرافيك Low وده الطبيعي من المعالج ده .. ومع ذلك اللعبة بتشتغل
كويس جدًا.
واخيرًا لعبة Fortnite جربت احملها من Play
Store إتحملت عادي .. وإشتغلت على أقل إعدادات جرافيك
.. بس للأسف التجربة كانت سيئة جدًا جدًا وكان في تقطيع بشكل بشع .. وعمومًا لسه مفيش
موبايل تحت الـ3 الاف بيشغل فورت نايت كويس.
وبالمناسبة الموبايل بيسخن شوية من عند الكاميرات .. وعمومًا معالجات ميدياتك
الـHelio G70, G80 والـG85 كلهم بيسخنوا مع الألعاب التقيلة.
عوامل الأمان وعناصر اخرى :-
البصمة في الظهر .. المكان بتاعها صغير شوية بس لما إيدك تاخد عليه هتلاقي البصمة
سريعة جدًا معاك .. والـFace Unlock سريع جدًا برده ومفيهوش اي
مشاكل.
الموبايل جاي بواجهة شاومي الـMIUI 11 مش الـ12 .. والموبايل اكيد هيجيله الـMIUI 12 .. الـDark Mode موجود في الموبايل ده وشغال
كويس جدًا .. والموبايل مفهوش لمبة إشعارات للأسف زيه زي الـRedmi Note 9.
بس فيه مايكروفون إضافي ومستشعر IR
Blaster موجودين في الطرف العلوي للموبايل .. المستشعرات
كلها موجودة وشغالة بدون مشاكل، الضوء والتقارب والبوصلة.
صوت الـRedmi 9
.. فلتة في فئته السعرية .. أعلى وأحسن صوت .. وصوت سماعات المكالمات عالي .. ومُمتاز
وصوت سماعات الأذن مقبول جدا.
بالنسبة لقوة الشبكات .. الـWiFi مُستقر .. بس مش بيجيب عدد شبكات كتير مقارنتًا بالموبايلات المنافسة .. أما شبكة المكالمات .. لاقيتها كويسة جدًا ومواجهتش معاها أي مشاكل لحد دلوقتي.
البطارية :-
بطارية ضخمة بتيجي بحجم 5000 مللي أمبير .. إستحملت معايا حوالي 8 ساعات شاشة مفتوحة .. وطبعًا ممكن تزيد على حسب إستخدامك.
منفذ الشحن USB Type C والموبايل بيدعم الشحن السريع 18 واط .. بس الشاحن المُرفق في العلبة 10 واط .. لما تشحن البطارية بالشاحن المُرفق هتشحن في 3 ساعات تقريبًا.
اما ولو إشتريت شاحن 18 واط وجربت هتلاقيها بتشحن في ساعتين وربع .. وده وقت كويس جدًا على سعر الموبايل.
الكاميرات :-
الموبايل جاي بـ4 كاميرات في الظهر .. الأساسية 13 ميجا بيكسل فتحة عدسة ضيقة شوية F/2.2 والعدسة التانية 8 ميجا بيكسل فتحة عدسة F/2.2 للتصوير الواسع .. والتالته 5 ميجا بيكسل ماكرو فتحة عدسة F/2.4 والأخيرة 2 ميجا بيكسل للعزل.
السيلفي بيجي بدقة 8 ميجا بيكسل بفتحة عدسة F/2.0 وهو موجود في نوتش الشاشة.
إعتمادك هيبقى فقط على سوفت وير شاومي للكاميرات اللي مش بيدعم Night Mode .. لإن للأسف المُعالج اللي هنا غير مدعوم في جوجل كاميرا لحد دلوقتي.
الكاميرا الخلفية اللي هنا معجبتنيش اوي .. الألوان مش مظبوطة .. والـHDR مش مظبوط أوي .. يعني هي يدوبك كاميرا تقضي الغرض وخلي بالك برده إن السعر قليل ومش هينفع تاخد موبايل مُتكامل بالسعر ده.
فحقيقي لو إنت بتقارن بين الكاميرا بتاعت الـRedmi 9 والـRedmi Note 9 .. فالنوت 9 في حته لوحده وأحسن بمراحل ويمكن يكون فرق السعر بينهم معظمه علشان الكاميرات.
لما نيجي نقارنه بالمنافس المُباشر الـRealme C3 هنلاقي تفوق واضح لكاميرا الـC3 في معظم أوضاع التصوير تقريبًا .. بس الـRedmi 9 بيتفوق في وجود عدسة Ultra Wide مش موجودة اصلًا في الـC3.
اما السيلفي فا على غير المتوقع .. عجبني جدًا جدًا، مش عارف ازاي .. الأداء حلو ومُتوازن ومعقول جدًا على سعر الموبايل .. ولما قارنته مع الـC3 .. لاقيت تفوق واضح لـRedmi 9 في السيلفي على الـC3 في كل الصور تقريبًا.
بالنسبة لتصوير الفيديوهات فا الـRedmi 9 موبايل إقتصادي .. وكمان معالجات الـG الجديدة من ميدياتك اخرها تصوير فيديوهات 1080p مع 30 فريم في الثانية ومفيش ثبات إلكتروني في الفيديوهات .. وفي مايكروفون اضافي لعزل الضوضاء علشان تاخد تجربة تصوير كويسه.
سعر الموبايل :-
الموبايل بيجي بنسختين في السوق المصري.
- النسخة الـ32 جيجا مع 3 جيجا رام بسعر 2222 جنية
- النسخة الـ64 جيجا مع 4 جيجا رام بسعر 2500 جنية
الرأي النهائي :-
مميزات Redmi 9 :-
عيوب Redmi 9 :-
إرسال تعليق